Tlukna avanga Pathian nena inṭhenna

Genesis bung 3-ah khan khawvela sual lo luh dan kan hmu. Setanan rulpui hmangin Evi a bum a, Pathianin ei a khap ngei mai 'a chhia leh a ṭha hriatna thei' chu an ei ta a ni. Hei hi thil lian tham lo anga lang, mahse, Pathian laka helna lian tak a ni.

• Pathian thupek bawhchhiatna a ni.
• Pathian ring lova, mahni duhdan lal tirna (Pride) a ni.
• Pathian thu aiin Setana dawt thu awiha an thlan zawkna kha a ni.

Pathianin thei an ei chuan an thih tur thu a sawi a. An taksa chu thi nghal lo mahse, an thlarau erawh a thi nghal a ni. Hei hi thlarau lama thihna kan tih chu a ni a, Pathian aṭanga inṭhen hranna lian ber a ni.

• Eden huan (Pathian awmpuina hmun) aṭanga hnawhchhuah an ni.
• Mahni inthiamlohna leh zahna a lo piang a, Pathian lakah an biru ta a ni.
• Amah pawl thei tura siam chu, sual avangin Pathian nen an inpawl thei ta lo.

Tlukna avang khan Adama te nupa chauh ni lovin, khawvel pumah chhiatna a lo thleng a. Tun thlenga natna, lungngaihna, leh thihna kan tuar thin te hi sual in a hrin chhuah vek a ni.

• Leiah hian ânchhia a awm phah a, hling leh hnim ṭhalo a to ta.
• Mihring leh mihring inkar (Nupa inkar thlengin) inlaichinna a chhia.
• Natna, hrehawmna, tawrhna leh a tawpa taksa thihna a lo thleng ta a ni.

Rom 5:12 ah chuan, "Chutichuan, mi pakhat avângin khawvêlah sual a lût a, sual avângin thihna a lût bawk a, chutiang bawkin mi zawng zawngin thil an lo tihsual avângin, thihnain mi zawng zawng a fan chhuak ta a." tiin kan hmu a. Adama thlahte kan nih avangin sual zia hi kan pianpui ta a ni.

• Tumah sual lova piang kan awm lo (Original Sin).
• Mahni ngawtin sual laka fihlim turin chakna kan nei lova, Pathian pawmtlak thil ṭha tih pawh kan theilo.
• Hei vang tak hian misual nilo, suala piang nilo, min rawn chhandamtu tur, Isua Krista kan mamawh zia a lang fiah ta a ni.