Piantharna (Born again)

Piantharna chu theihna thar (new ability) neih ngawt lam a ni lova, NUN THAR (new life) neih a ni zawk. Mihring piangsual tawh, thlarau lama thi kha Pathian thiltihtheihna avanga nung thar leh tihna a ni.

• Isua zui tura thinlung thar, duhdan thar leh ngaihtuahna thar neihna a ni.
• Sual lama tluk luh chakna aiin Pathian tilawm tura chakna in min rawn luahkhat zawk ṭhin.
• Nun siamṭhat (reformation) chauh ni lovin, thlarau siam thar (regeneration) a ni.

Keimahni theihna emaw, thil ṭha kan tih vang emaw a piangthar thei kan ni lo. Piantharna hi Pathian hnathawh a ni a, Thlarau Thianghlim kaltlanga tih puitlin a ni.

• Thlarau Thianghlimin kan sualzia min hriattir a, Isua kan mamawhzia min hmuhtir ṭhin.
• Kan inngaihtlawm a, Isua kan Lal leh Chhandamtu atana kan pawm chiah khan Thlarauvin min pianthartir a ni.
• Chu thlarau chuan kan chhungah awmhmun a rawn khuar a, theihna thar min rawn pe ṭhin.

2 Korinth 5:17 ah chuan, "Chumi avâng chuan tu pawh Kristaa a awm chuan thilsiam thar a lo ni a; thil hluite chu a ral ta a; ngai teh u, a lo thar ta." tih kan hmu. Piantharna hian kan nundan a thlak danglam ṭhin.

• Piantharna hi vawilehkhata famkimna a ni lova, mahse kan kawng zawh lai a inthlak a ni.
• Sual ngaina ṭhin khan sual a haw ta ṭhin a, sual hian hrehawm min tih tir tawh zawk ṭhin.
• Nitinin Pathian nungchang kan pu chho hret hret zel a, felna lamah hma kan sawn ṭhin (Sanctification).

Johana 1:12 ah chuan, "Nimahsela, amah lâwm apiang chu, an hnênah Pathian fate nih theihna tûr a pe, a hming ringtute chu" tiin kan hmu a. Piantharna hi Pathian chhungkaw zinga telna a ni.

• Piantharna kaltlangin Pathian chu kan "Pa" a lo ni a, khawvelah fahrah kan ni tawh lo.
• Pathian fa kan nih avangin, thil ropui tak leh chatuan nunna neitu tur kan lo ni ta a ni.
• Pathian kan be ngamin kan hnaih ngam tawh a ni.